Andri: Alls ekki orðinn góður af meiðslunum

Andri Ólafsson skoraði sigurmark ÍBV gegn Stjörnunni í kvöld úr vítaspyrnu þegar skammt var til leiksloka. Hann var þá nýkominn inn á sem varamaður en hann hefur átt við meiðsli að stríða að undanförnu.

„Auðvitað er ég ánægður með að skora en þó aðallega stigin þrjú,“ sagði Andri í samtali við Vísi en viðtalið má sjá í heild sinni hér fyrir ofan.

„Stjarnan kom okkur svolítið á óvart með því að pressa á okkur í byrjun. Kannski áttum við ekki von á því en okkur gekk illa með að eiga við það. Okkur tókst að vinna okkur betur inn í leikinn en seinni hálfleikur var að mestu jafn.“

Þrátt fyrir að hann spilaði í kvöld síðustu tíu mínúturnar á hann enn langt í land með að ná sér góður af meiðslunum.

„Ég er alls ekki orðinn góður af þeim. Ég fer í meðhöndlun eftir leik og vonandi verð ég orðinn fljótt góður af þessu. En eins og staðan er í dag þá er eitthvað í að ég geti spilað heilan leik aftur.“

„En það er ekki slæmt að koma inn á, hlaupa í fimm mínútur og skora sigurmarkið. Það er ágætt.“