Manúela ætlar ekki að kæra Grétar - vegna barnanna

Manúela Ósk Harðardóttir ætlar ekki að kæra fyrrum eiginmann sinn Grétar Rafn Steinsson, knattspyrnumann, fyrir brot á friðhelgi einkalífsins. Grétar leigði breska einkaspæjara til þess að fylgjast með ferðum Manúelu og fjölskyldu hennar í haust. Manúela segir í yfirlýsingu að hún falli frá kærunni með hagsmuni barna þeirra að leiðarljósi.

Í yfirlýsingunni, sem er Vilhjálmur H. Vilhjálmsson lögmaður Manúelu, skrifar undir segir að svo virðist sem Grétar Rafn hafi brotið trúnaðarsamkomulag þeirra á milli sem gert var fyrir breskum dómstólum.

DV fjallaði um málið á forsíðu blaðsins í gær og segir Vilhjálmur að „augljóst er að heimildarmaður blaðsins er Grétar Rafn eða einhver honum tengdur. Því til staðfestingar má vísa til þess að DV hefur undir höndum hluta gagna úr dómsmáli milli Manúelu og Grétars, en gögnin geta ekki verið komin til DV frá neinum öðrum en Grétari," segir í yfirlýsingunni.

Þar segir einnig að Manúela vilji koma á framfæri að dómurinn sem féll í Bretlandi á föstudaginn sé sanngjarn. „Áður hafði Manúel gert sitt ítrasta til þess að ná samkomulagi við Grétar utan réttar bæði með og án aðstoðar íslenskra og breskra lögmanna en án árangurs. Niðurstaðan dómsmálsins er að öllu leyti í samræmi við gildandi lög og hefðir í breskum rétti en óumdeilt er að lögsaga í málinu var hjá breskum dómstólum."

Þá segir einnig í yfirlýsingunni að ranglega sé haldið fram af DV að skýrslan sem einkaspæjararnir unnu hafi haft einhverja þýðingu um niðurstöðu dómsmálsins. „Þvert á móti þá tiltók dómari málsins það sérstaklega við dómsuppkvaðningu í London, föstudaginn 25. nóvember sl., að skýrslan hafi verið þýðingarlaus og sóun á bæði tíma og fjármunum, en Grétar mun hafa greitt háar fjárhæðir fyrir skýrsluna."

„Að vel athuguðu máli hefur Manúela hins vegar ákveðið að láta kyrrt liggja vegna þessara réttarbrota Grétars og mun hvorki leita réttar síns hjá þartilbærum yfirvöldum á íslandi eða í Bretlandi. Er það gert með hagsmuni barna þeirra að leiðarljósi,“ segir enn fremur í yfirlýsingunni.

Hægt er að lesa yfirlýsinguna með því að smella á hlekkinn hér að neðan.