Úthlutun Mæðrastyrksnefndar Reykjavíkur í 83 sinn

Hjartagæska Íslendinga sýnir sig í margskonar myndum rétt fyrir jól og ekki síst við söfnun og úthlutun jólaglaðninga Mæðrastyrksnefndar eins og Hugrún Halldórsdóttir fékk að kynnast í dag.

Í dag komu nokkrir kvenskörungar saman og kynntu jólaúthlutun Mæðrastyrksnefndar Reykjavíkur sem fer nú fram í áttugasta og þriðja sinn. Úthlutanir í fyrra voru um fjögurþúsund og býst Ragnhildur Guðmundsdóttir, formaður, við álíka fjölda þetta árið.

„Í jólaglaðningi er fyrst og síðast góður matur. Það er kjöt og það er ís, grænmeti og ávextir og eitt og annað sem maður notar á jólunum," segir Ragnhildur Guðmundsdóttir, formaður Mæðrastyrksnefndar Reykjavíkur.

Matvæli og ýmsar vörur tengdar jólahaldinu hafa þegar borist frá einstaklingum og fyrirtækjum.

„Íslendingar þeir eru nefnilega mjög hjálpsöm þjóð þegar í harðbakkann slær. Og við höfum verulega fundið fyrir því," segir Ragnhildur.

Og Mæðrastyrksnefnd gefur ekki einungis mat og gjafir þessi jól heldur einnig hlýju og kærleik. Og ekki nóg með það heldur fá sjálfboðaliðarnir slíkt hið sama til baka frá þeim sem þiggja glaðningana.

„Það kom til mín maður í gær sem kemur mjög sjaldan en þegar hann kemur þá kemur hann vegna þess að ég veit að hann á enga peninga. Þá yfirleitt lítur hann ekki upp, kærir sig ekki um það, en undanfarið þá hefur hann gert það af því að maður tekur utan um hann og segir er ekki allt í lagi og hvernig hefurðu það. Og í gær þá fannst mér svo yndislegt þegar hann kom svona dapur, það var ekki yndislegt, heldur þegar hann fór, þá fór hann með bros á vör og þegar hann sagði: "það er svo gott að koma til ykkar" þá verður maður náttúrulega svo glaður," segir Lára Axelsdóttir, sjálfboðaliði.

Úthlutað verður dagana 19. til 21. desember að Fiskislóð 14. Nánari upplýsingar um skráningar og annað má finna á vef Mæðrastyrksnefndar.