Andrés þó!

Alríkisdómari í Pennsylvaníu hefur úrskurðað að kona sem sakar Andrés Önd um að hafa káfað á brjóstunum á sér geti höfðað mál gegn illfyglinu þar í bæ. Hún þurfi ekki að höfða það í Flórída. Það var þar sem meint atvik átti sér stað í Disney skemmtigarðinum, í maí árið 2008.

Apríl Magolon er 27 ára gömul. Hún heldur því fram að síðan þetta gerðist hafi hún þjáðst af streitu sem lýsi sér í martröðum, meltingatruflunum og öðrum kvillum sem muni hrjá hana til frambúðar.

Í málshöfðun hennar segir að starfsmenn skemmtigarðsins séu þekktir fyrir að vera fjölþreifnir. Stjórnendur garðsins láti það óátalið því þeim sé meira umhugað um gróða sinn en öryggi almennings.