Gunnar um ákæru Ríkissaksóknara: Þetta er bara út í hött

Gunnar Birgisson, fyrrverandi stjórnarformaður Lífeyrissjóðs Kópavogsbæjar hafði ekki heyrt af ákærum Ríkissaksóknara á hendur honum og fimm öðrum, þegar Vísir hafði samband við hann í kvöld. Hann segir ákærurnar fáránlegar. Ákært er í tveimur liðum, annarsvegar fyrir ólögmætar lánveitingar til Kópavogsbæjar og hinsvegar fyrir að hafa veitt Fjármálaeftirlitinu rangar upplýsingar.

„Mér finnst þetta hreint út sagt fáránlegt, bara út í hött,“ segir Gunnar. Hann segir að í þessu máli hafi stjórnarmennirnir fyrst og fremst verið að hugsa um að bjarga fjármunum fyrir sjóðinn og bæinn, sem beri fulla ábyrgð á sjóðnum. „Ekki voru stjórnarmenn að græða á þessu. Við vorum að bjarga peningum fyrir bæinn og sjóðinn,“

„Það er ljóst að ef á að ákæra okkur, þá þarf örugglega að ákæra mjög marga, í lífeyrissjóðunum og í bankakerfinu. Þeir hljóta að þurfa að ákæra mjög marga ef það á að gera þetta svona,“ bætir hann við.

Málið snýst um lánveitingar sjóðsins til bæjarins frá síðari hluta ársins 2008 og fram í maí 2009.

Hvað varðar hinn lið ákærunnar, að hafa blekkt Fjármálaeftirlitið segir Gunnar að gert hafi verið samkomulag við FME skömmu eftir að lánveitingarnar fóru fram. „Það var síðan staðfest í vitnaleiðslum í þessu máli. Þeir urðu að leggja það fram sem málsgögn þá, gátu ekki legið á því lengur. Þannig að þetta mál er hið ótrúlegasta.“

„Ef þetta er það sem dómskerfið er að vegast í, að elta fólk fyrir svona þar sem það var að vinna eftir bestu samvisku og bestu getu, þá er dómskerfið skrýtið, þá er eitthvað að. Enda er greinilega eitthvað að,“ segir Gunnar I. Birgisson að lokum.