Ireland í læknisskoðun hjá Newcastle

Írinn Stephen Ireland fer í læknisskoðun í dag hjá Newcastle en hann mun að öllum líkindum ganga til liðs við félagið að láni á morgun.

Þessi 24 ára leikmaður hefur ekki fengið mörg tækifæri í liði Gerard Houllier í vetur en hann kom upphaflega til félagsins í stjórnartíð Martin O'Neill. Talið er að Ireland og Houllier hafi lent saman í desember en franski þjálfarinn hefur verið óánægður með leikmanninn í vetur.

Ireland var frábær í liði Manchester City fyrir tveimur leiktíðum en í kjölfar stórra leikmannakaupa hjá City var hann seldur til Villa. Nú er spurningin hvort hann nái að koma ferlinum á réttan kjöl eftir mögur ár.