Berlusconi sakaður um að hafa sofið hjá fleiri unglingsstúlkum

Enn syrtir í álinn hjá Silvio Berlusconi forsætisráðherra Ítalíu en saksóknarar þar í landi hafa sakað hann um að hafa sofið hjá vændiskonu sem var undir lögaldri. Nú segja saksóknararnir að ekki sé aðeins um eina unglingsstúlku að ræða, heldur margar.

Farið hefur verið fram á húsleitarheimildir í nokkrum af íbúðum Berlusconis en saksóknararnir halda því fram að hann hafi borgað vændiskonunum ungu meðal annars með því að leyfa þeim að búa í íbúðunum. Vændi er ekki ólöglegt á Ítalíu en að borga fyrir kynlíf með konu undir 18 ára aldri er hinsvegar lögbrot.