Wenger gagnrýnir Chelsea harðlega

Arsene Wenger er alls ekki sáttur við vinnubrögð Chelsea og segir knattspyrnustjóri Arsenal að hræsni einkenni ákvarðanir forráðamanna meistaraliðs Chelsea.

Wenger setur stórt spurningamerki við ákvarðanir Chelsea á leikmannamarkaðinum eftir að liðið keypti tvo leikmenn fyrir 70 milljón pund á lokadegi félagaskiptagluggans.

Í samtals við Sky fréttastofuna segir Wenger að Chelsea hafi stutt tillögu UEFA um reglugerð sem tekur gildi keppnistímabilið 2014-2015 þar sem ýmsar takmarkanir verða settar varðandi upphæðir í leikmannakaupum. Þar verður liðum bannað að kaupa leikmenn fyrir hærri upphæð en samanlagðar tekjur liðsins á þriggja ára tímabili þar á undan.

„Chelsea studdi þessa tillögu. Þeir tilkynna að morgni að félagið hafi tapað 70 milljónum punda á einu ári og eftir hádegi kaupa þeir leikmenn fyrir 75 milljónir punda. Það eru engin skynsamleg rök á bak við þessa ákvörðun," sagði Wenger m.a. í viðtalinu.