Telur fugladauða stafa af óhappi við flutning á eiturgasi

Leyniþjónusta rússneska hersins GRU telur að fugladauðinn í Bandarikjunum stafi af óhappi í flutningi á eiturgasi á vegum bandaríska hersins.

Sagan hljómar eins og spennubók en samkvæmt vefblaðinu The European Union Times hefur GRU sent Vladimir Putin forsætisráðherra Rússlands leynilega skýrslu um málið.

Um er að ræða svokallað fosgen eiturgas sem m.a. var notað með skelfilegum afleiðingum í fyrri heimsstryjöldinni.

Bandaríkjamenn fundu töluvert magn af þessu gasi í Írak, að sögn GRU, og fluttu til Arkansas en þar er helsta miðstöð þeirra í eiturefnahernaði. Verið var að flytja 63 tonn af gasinu frá miðstöðinni þegar það lak út vegna óhapps. Gasið veldur innri blæðingum í lungunum og leiðir til þess að þau eyðileggjast.

Í skýrslunni segir einnig að hið dularfulla morð á hinum 66 ára gamla John Wheeler fyrrum hernaðarráðgjafa þriggja forseta Bandaríkjanna tengist óhappinu. Samkvæmt skýrslu GRU ætlaði hann að upplýsa um málið áður en hann var myrtur.

Eins og kunnugt er af fréttum fannst lík Wheelers á ruslahaug í Delaware fyrr í vikunni eftir að hans hafði verið saknað í nokkra daga.