Friedel: Þurfum ekki að hafa áhyggjur ef við berjumst svona

Brad Friedel, markvörður Aston Villa, er hæstánægður með baráttuna í hans liði sem lenti tvívegis undir gegn Chelsea í dag en náði á endanum stigi. Leikurinn endaði með jafntefli 3-3.

„Þetta er verulega sterkt stig," sagði Friedel. „Eftir slæmt gengi þurftum við á því að halda að fá eitthvað út úr þessum leik. Að ná stigi á Stamford Bridge er mjög gott."

„Við lentum undir 3-2 en félagar mínir eiga hrós skilið. Menn jöfnuðu sig strax á vítaspyrnudómnum sem ég tel að hafi verið rangur. Vonandi kemur þetta okkur á beinu brautina. Ef við höldum áfram að berjast svona hef ég engar áhyggjur."