Markvörður AZ ekki í leikbann | Kemur til greina að spila aftur

Esteban Alvarado, markvörður AZ Alkmaar, þarf ekki að taka út leikbann vegna rauða spjaldsins sem hann fékk fyrir að sparka í áhorfanda í leik liðsins gegn Ajax í hollensku bikarkeppninni í gær.

Eins og sjá má í greininni hér fyrir neðan hljóp áhorfandi inn á völlinn í miðjum leik og ætlaði að ráðast á Alvarado. Sá svaraði fyrir sig og sparkaði í áhorfandann nokkrum sinnum.

Fyrir það fékk hann rauða spjaldið hjá dómara leiksins en þjálfari AZ ákvað að taka lið sitt af velli í kjölfarið og þurfti því að blása leikinn af.

Hollensa knattspyrnusambandið mat atvikið svo að um sjálfsvörn hafi verið að ræða og því verði honum ekki refsað fyrir það.

Staðan í leiknum var 1-0 þegar að leik var hætt og er enn óvíst hvort að leikurinn fari fram aftur. Það kemur til greina en málið er nú til skoðunar hjá hollenska knattspyrnusambandinu.