Tillaga Tómasar Inga kolfelld - vilja samt hlé á aðildarviðræðum

Tillaga Tómasar Inga Olrich, fyrrverandi menntamálaráðherra, var felld. Hann lagði fram breytingartillögu sem gekk út á að umsókn um aðild að Evrópusambandinu yrði dregin til baka. Alls greiddu 1026 atkvæði. Já sögðu 355. Nei sögðu 665. Auðir og ógildir seðlar voru sex. Því var tillaga Tómasar Inga felld með miklum meirihluta.

Tillagan var samþykkt í hádeginu þegar hún var fyrst lögð fram með 258 atkvæðum gegn 253. Þá var farið fram á skriflega atkvæðagreiðslu þar sem mjótt var á munum.

Tillaga Elliða Vignissonar, bæjarstjóra Vestmannaeyja, um að landsfundur álykti að hætta skuli aðildarviðræðum við evrópusambandið og ekki sótt um að nýju án þess að vilji þjóðarinn til þess liggi fyrir í þjóðaratkvæðagreiðslu, var einnig felld. Nei sögðu 617 og 430 sögðu já.

Breytingartillögu fyrrverandi ráðherranna Björns Bjarnasonar og Friðriks Sophussonar, um að gert yrði hlé á aðildarviðræðum og ekki gengið til þeirra að nýju, fyrr en að lokinni þjóðaratkvæðagreiðslu, var samþykkt.