Google biðst afsökunar á klúðri

Síðasta vika var fremur illa heppnuð hjá tæknirisanum Google. Á miðvikudaginn var birtu þeir ofangreinda tilkynningu á twittersíðu sinni. Ástæðan var póstforritið gmail, sem Google höfðu hannað fyrir stýrikerfi Apple og sent frá sér í vikunni.

Forritið reyndist gallað og dró Google það til baka og baðst afsökunar á klúðrinu.

Og ekki nóg með það, heldur sendi Google einnig frá sér uppfærða útgáfu af Google Reader í vikunni. Því var beinlínis lýst sem „hörmungum".

Uppákomurnar vekja tvær áleitnar spurningar hjá blaðamanni CNN.

Númer eitt: Einhvern veginn hefur Google tekist að búa til svalari og betur heppnuð forrit fyrir stýrikerfi Android heldur en Apple. Þeir hafa enda hagsmuni af því að Android vikri betur, en Google hannaði það kerfi. Spurningin er hvort Google sé raunverulega að senda frá sér forrit fyrir Apple sem ekki virka.

Númer tvö: Þessi tvö klúðurslegu mistök koma í kjölfar þess að fyrirtækið sendir frá sér forrit eins og Google+, Google Buzz, Google Wave og Google Health. Ekkert af þessu hefur vakið sérstaka lukku. Því er spurning hvort fyrirtækinu sé að fatast flugið?

Ýmsir hafa í vikunni velt því upp hvort Google sé enn sá ósigrandi tæknirisi sem menn áður héldu og margir lýst miklum vonbrigðum með fyrirtækið.