Sarkozy um Netanyahu: „Ég þoli hann ekki - hann er lygari“

Þjóðarleiðtogarnir Nicholas Sarkozy Frakklandsforseti og kollegi hans í Bandaríkjunum Barack Obama lentu í ógöngum á G20 fundinum í Cannes á dögunum. Þeir voru að bíða eftir því að blaðamannafundur hæfist þegar talið barst að Bejamín Netanyahu forsætisráðherra Ísraels.

Spjallið byrjaði á því að Obama lýsti vonbrigðum sínum sínum með það að Frakkar skyldu styðja umsókn Palestínu hjá Unescko. Talið barst í framhaldi af því að Netanyahu. Þá sagði Sarkozy:„Ég þoli hann ekki. Hann er lygari.“ Obama svaraði þá um hæl: „Ert þú kominn með nóg af honum? Ég þarf að eiga við hann á hverjum einasta degi.“ Leiðtogarnir áttuðu sig ekki á því að búið var að kveikja á hljóðnemunum sem nota átti á fundinum og því heyrðu þeir blaðamenn, sem höfðu vit á því að tengja heyrnartæki sín við hljóðkerfið, skýrt og greinilega það sem þeim fór á milli.

Fyrst var greint frá málinu á franska vefmiðlinum Arret Sur Images og skömmu síðar staðfesti fréttaritari Reuters sem var á staðnum að samtalið hafi átt sér stað.