Brennimerktu á sér rassana - allt tiltækt slökkvilið kallað á svæðið

Þrír piltar um tvítugt frá ástralska bænum Toowoomba, fóru líklega á eitt heimskulegasta fyllerí síðustu helgar, þegar þeir enduðu á því að brennimerkja rassinn á sér með heitum járnteini.

Piltarnir, sem eru 18 og 21 árs gamlir sátu að sumbli við varðeld þegar einhver þeirra virðist hafa fengið þá hugmynd að þeir myndu brennimerkja á sér rassinn með eldglóandi teini.

Í ljósi aðstæðna tóku þeir vel í hugmyndina.

Það var hinsvegar daginn eftir sem þeir vöknuðu grjótþunnir með nístandi sársauka í rassinum. Þá þurftu þeir að rífa nærbuxurnar af svöðusárunum með tilheyrandi sársauka, sem varð til þess að þeir ákváðu að kalla eftir aðstoð.

Það er fyrst þá sem sagan verður góð, því svo virðist sem útkallið hafi misfarist með heldur vandræðalegum afleiðingum. Út bárust boð til lögreglu og sjúkraflutninga- og slökkviliðsmanna að alvarlegt slys hefði orðið á heimilinu og fjöldi manns væri stórslasaðir. Því var allt tiltækt lið kallað út með tilheyrandi látum.

Þegar á vettvang var komið stóðu þrír þunnir piltar með nístandi sársauka í rassinum á hlaðinu og reyndu að útskýra að þeir einir væru slasaðir, en ekki lífshættulega eins og í fyrstu var talið.

Neyðaraðstoðin gat ekki á sér setið, þeir hlógu að piltunum og báðu þá meðal annars um að stilla sér upp svo þeir gætu tekið myndir af brenndu rössunum.

Nú er fréttin búin að berast út um alla Ástralíu - og allan heiminn raunar.

Einn piltanna, hinn 21 árs gamli Luke Moroney, segir í viðtali við ástralska fréttavefinn The Chronicle, að hann muni óljóst eftir því þegar hann brennimerkti sig. Núna þurfi hann hinsvegar að leita til læknis þar sem hann er með sýkingu í rassinum.

Sjúkraflutningamennirnir skildu deyfilyf og smyrsl eftir handa piltunum áður en þeir voru yfirgefnir. Það hefur þó dugað skammt á sært stolt piltanna.