Litríkur pólitískur ferill Berlusconi kominn á endastöð

Pólitískur ferill Silvio Berlusconi forsætisráðherra Ítalíu er kominn á endastöð en hann hefur verið í litríkari hópi ítalskra stjórnmálamanna á síðustu tveimur áratugum.

Tilkynning Berlusconi í gærkvöldi um að hann myndi segja af sér kom ekki á óvart. Hann eigin flokksmenn hafa loksins gefist upp á honum en óhætt er að segja að Berlusconi hafi ekki aukið virðingu Ítalíu út á við þau ár sem hann hefur setið á stóli forsætisráðherra.

Á þeim tíma sem Berlusconi hefur gengt embætti forsætisráðherra með hléum frá 1994 hefur hann staðið af sér 50 vantrausttillögur á ítalska þinginu og fjöldi dómsmála gegn honum fyrir spillingu hefur koðnað niður í ítalska dómskerfinu.

Berlusconi, sem orðinn er 75 ára gamall þykir glúrinn kaupsýslumaður og hann byggði upp mikið veldi í byggingariðnaði og fjölmiðlum á sínum yngri árum. Í dag er hann þriðji auðugasti maður Ítalíu og raunar í hópi 40 auðugustu manna heimsins samkvæmt Forbes tímaritinu sem metur auðæfi hans á 9 milljarða dollara eða yfir 1.000 milljarða króna.