Enn er beðið eftir nýrri þjóðstjórn í Grikklandi

Ekki tókst að mynda fyrirhugaða þjóðstjórn í Grikklandi í gærdag eins og stefnt var að. Grískir embættismenn segja að stjórnin verði tilkynnt í dag.

Í frétt um málið á BBC segir að fyrri stjórn landsins og stjórnarandstaðan hafi enn ekki komið sér saman um að Lukas Papademos, fyrrum aðstoðarbankastjóri Evrópska seðlabankans, verði forsætisráðherra í þjóðstjórninni.

Þá hafi ekki hjálpað til í gærdag að Olli Rehn efnahagsmálastjóri Framkvæmdastjórnar Evrópusambandsins krafðist þess að flokksleiðtogarnir Papandreou og Samaras undirrituðu ábyrgð á því að hin nýja stjórn myndi standa við skuldbindingar sínar gagnvart Evrópusambandinu.  Slíkt taldi Samaras móðgun við grískt þjóðarstolt.