Heavy D látinn

Bandaríska rappstjarnan Heavy D lést í gær, 44 ára að aldri. Hann hné niður fyrir utan heimili sitt í Los Angeles og lést á spítala skömmu síðar.

Heavy D var meðal fyrstu rapparanna sem náði alþjóðlegum vinsældum í kringum 1990 og átti sinn hlut í að auka vinsældir tónlistarinnar á alþjóðavettvangi. Á þeim árum gaf hann út nokkrar vinsælar plötur með hljómsveit sinni og kölluðust þeir Heavy D & the Boyz. Eitt þekktasta lag þeirra var Now That We Found Love og má sjá myndbandið við það hér fyrir ofan.

Heavy D hét réttu nafni Dwight Arrington Myers. Hann hefur reglulega gefið út plötur í gegnum árin og verið viðriðinn skemmtanabransann. Meðal annars sem stjórnarformaður plötuútgáfunnar Uptown Records og sem leikari. Síðasta hlutverk hans á ferlinum var í kvikmyndinni Tower Heist, sem er einmitt frumsýnd hérlendis um helgina.