FIFA lúffar fyrir Englendingum og leyfir valmúann

Alþjóðaknattspyrnusambandið FIFA hefur dregið í land og ákveðið að leyfa Enska landsliðinu að bera valmúamerki á keppnistreyjum sínum í landsleik á móti Spáni um næstu helgi. Valmúamerkið nota Bretar í ákveðinn tíma á hverju ári til þess að minnast fallinna hermanna.

Ákveðið hafði verið að landsliðstreyjan um næstu helgi yrði merkt valmúanum en FIFA tók það ekki í mál og vildi meina að merkið væri af pólitískum toga. Það er ekki ofsögum sagt að Bretar hafi orðið æfir þegar þeir heyrðu fréttirnar. Málið var tekið upp á þinginu í London í dag og fordæmdi David Cameron forsætisráðherra þessa þvermóðsku í yfirmönnum FIFA. Ekki nóg með það heldur ákvað Vilhjálmur prins að skerast í leikinn og hafði hann samband við æðstu stjórnendur knattspyrnusambandsins til þess að reyna að koma vitinu fyrir þá.

Þrýstingurinn virðist hafa haft sín áhrif, því nú hefur FIFA fallist á að landsliðið fái að bera svört armbönd með valmúamerkinu.