Velti traktor og slasaði 28 manns

Michael Hermes, 47 ára gamall bóndi frá Ohio í Bandaríkjunum, lýsti yfir sakleysi sínu þegar hann var leiddur fyrir dómara í dag, fyrir að aka traktor með tengivagni undir áhrifum áfengis.

Alls voru 28 einstaklingar á tengivagninum þegar Hermes velti honum síðastliðið laugardagskvöld.

Nokkrir farþeganna brutu bein í líkama sínum í byltunni á meðan öðrum var einfaldlega brugðið. Það þykir hinsvegar ótrúleg mildi að ekki hafi farið verr.

Lögreglan, sem kom fyrst á vettvang, segist hafa fundið opnar áfengisflöskur á vettvangi. Þegar þeir báðu Hermes um að blása í áfengismæli neitaði hann staðfastlega.

Hermes hefur verið ákærður fyrir hættulega árás gagnvart farþegunum.