Helmingur unglingsstúlkna notað skaðlegar aðferðir til þess að léttast

Um helmingur íslenskra stúlkna í 10. bekk sem eru yfir kjörþyngd hefur notað skaðlegar aðferðir til að reyna að hafa stjórn á þyngd sinni.

Þetta sýnir ný rannsókn á tæplega tvö þúsund stúlkum í 10. bekk sem kynnt verður á Félagsvísindaráðstefnu í Háskóla Íslands á morgun.

Rannsóknin sýnir að um helmingur of þungra stúlkna hefur beitt einni til þremur skaðlegum aðferðum til að reyna að stjórna þyngd sinni og um níu prósent hafa beitt fjórum til sex aðferðum í sama tilgangi.

Dæmi um skaðlegar aðferðir sem stúlkurnar hafa notað er að sleppa því að borða í sólarhring, kasta upp, nota megrunarpillur eða hægðarlyf og reykja tóbak.

Rannsóknin er hluti af alþjóðlegu verkefni sem styrkt var af Alþjóðaheilbrigðismálastofnuninni en hún var unnin af Rannsóknarsetri forvarna við Háskólann á Akureyri.

Ársæll Arnarsson - prófessor í sálfræði við Háskólann á Akureyri.

„Rannsóknir hafa sýnt að það er fátt sem hefur jafn sterka fylgni við ofþyngd eins og fjöldi megrunarkúra sem einstaklingurinn hefur reynt. Þannig að því fleiri megrunarkúra sem einstaklingurinn reynir því mun þyngdri verður hann. Þannig að ef maður horfir á þetta, að helmingurinn af stelpunum sem eru of þungar, á þessum unga aldri eru farnar að nota svona alvarlega skaðlegar aðferðir. Þá getur maður ekki verið mjög bjartsýnn á framhaldið,“ segir Ársæll Arnarsson, prófessor í sálfræði við Háskólann á Akureyri.

Það vekur einnig athygli að um fjórðungur stúlkna sem eru í undirþyngd hafa notað sömu skaðlegu aðferðir til að stjórna þyngd sinni.

„Við erum að sjá að þær eru í töluverðu magni að kasta upp, framkalla uppköst, nota megrunarpillur og reykja og því umlíkt. Það er náttúrulega enn ein ástæðan til þess að vera svartsýn,“ segir Ársæll.