Willum vill halda áfram að þjálfa - ekki heyrt frá KSÍ

"Þeir kölluðu mig á fund til Keflavíkur þar sem mér var tjáð að þeir ætluðu sér að róa á önnur mið. Þetta var heiðarlega gert hjá góðum mönnum sem standa að deildinni í Keflavík," sagði Willum Þór Þórsson við Vísi en Keflvíkingar tilkynntu í dag að þeir ætluðu sér ekki að semja við Willum á nýjan leik.

"Ég get ekki sagt að ég sé eitthvað sérstaklega ósáttur við að fá ekki að halda áfram. Ég hefði alveg viljað halda áfram en þá þarf að ræða forsendur og álíka. Það fór aldrei svo langt að við ræddum slíka hluti. Þeir voru búnir að ákveða að skipta um þjálfara."

Willum Þór segist skilja sáttur við Keflvíkinga en hann neitar því þó ekki að hann hafi þurft að vinna við erfiðar aðstæður.

"Þetta var erfitt fyrir alla. Fjárhagslega erfitt og mikla mannabreytingar. Það er líka margt jákvætt sem hefur gerst. Margir ungir leikmenn hafa komið inn úr 2. flokki og voru alls tíu í leikmannahópnum. Ég skil því sáttur og geng nokkuð stoltur frá félaginu. Ég er ekki viss um að allir séu sammála því en það er eins og gengur."

Willum Þór segist hafa mikinn áhuga á því að þjálfa áfram og vílar ekki fyrir sér að fara niður um deild ef því er að skipta.

"Ég hef mikinn áhuga á að þjálfa áfram. Ég hef enn gaman af þessu og hef lofað mér því að ég hætti þegar ég missi ástríðuna fyrir fótboltanum. Ég hef áður farið niður um deild að þjálfa og get vel hugsað mér það aftur," sagði Willum en hann hefur ekki fengið nein símtöl um önnur störf.

Hann hefur í nokkurn tíma verið orðaður við landsliðsþjálfarastarfið en Willum segist ekkert hafa heyrt frá KSÍ sem er í viðræðum við Lars Lagerback.

"KSÍ ætlar ekki að vera með Futsal-landslið í vetur þannig að ég heyri ekkert frá þeim," sagði Willum léttur.