Petrov segir Agbonlahor í sama flokki og Ronaldo

Búlgarinn Stiliyan Petrov hefur mikið álit á liðsfélaga sínum hjá Aston Villa, sóknarmanninum Gabriel Agbonlahor. Telur hann að kappinn sé í sama gæðalfokki og Cristiano Ronaldo.

Agbonlahor verður með enska U-21 landsliðinu sem mætir því íslenska á Laugardalsvelli á morgun klukkan 17.30

Agbonlahor hefur verið öflugur í upphafi leiktíðarinnar í ensku úrvalsdeildinni og skoraði eitt og lagði upp annað í 2-0 sigri Aston Villa á Wigan um helgina.

„Það er mikið rætt um Ronaldo en ef maður skoðar hvaða hæfileika Gabby býr yfir er vel hægt að setja þá í sama flokk,“ sagði Petrov við enska fjölmiðla.

„Hann er fljótur og sterkur, skorar mörk og býr þau til. Ég hef reynt að hvetja hann til dáða og mun gera það áfram.“

„Við erum með marga frábæra leikmenn sem búa yfir ótrúlegum hæfileikum,“ bætti Petrov við.