Er Arsene Wenger að safna fyrirliðum hjá Arsenal?

Arsenal var í aðalhlutverki á lokadegi félagsskiptagluggans í gær en Arsene Wenger náði í fimm nýja leikmenn áður en glugginn lokaði. Þrír af þessum fimm leikmönnum eru eða voru fyrirliðar í sínum liðum og þar með eru níu fyrirliðar sem spila með Arsenal-liðinu í dag. Hollendinginn Robin van Persie, sem ber fyrirliðaband Arsenal, er einn þeirra þótt að hann sé ekki fyrirliði síns landsliðs.

Arsenal-liðið hefur oft mátt þola gagnrýni á að það vantaði leiðtoga í liðið en það er ekki hægt að sjá annað út úr þróun mála á Emirates að stjórinn Arsene Wenger sé hreinlega að safna fyrirliðum.

Í Arsenal-liðinu í dag leika sjö fyrirliðar landsliða og áttundi fyrirliðinn er síðan Robin van Persie sem hefur stundum borið fyrirliðabandið hjá hollenska landsliðinu. Þá má einnig taka inn í þennan hóp Þjóðverjann Per Mertesacker sem var fyrirliði Wersder Bremen áður en Arsenal keypti hann í gær.

Níu fyrirliðar í Arsenal-liðinu í dag:

Robin van Persie, fyrirliði Arsenal

Thomas Vermaelen, fyrirliði Belgíu

Aaron Ramsey, fyrirliði Wales

Andrey Arshavin, fyrirliði Rússlands

Tomas Rosický, fyrirliði Tékklands

Marouane Chamakh, fyrirliði Marokkó

Park Chu-Young, fyrirliði Suður-Kóreu

Yossi Benayoun, fyrirliði Ísrael

Per Mertesacker, var fyrirliði Werder Bremen