Kolbeinn: Dreymt um að fá að spila gegn liði eins og Real Madrid

Kolbeinn Sigþórsson verður væntanlega í eldlínunni með íslenska landsliðinu gegn Noregi í kvöld. Vísir hitti á hann í Osló í gær og ræddi við hann um tímabilið sem er fram undan hjá hollenska stórliðinu Ajax.

„Það hefur gengið mjög vel hjá mér. Klúbburinn er frábær og ég sjálfur er byrjaður að skora og liðið að vinna leiki. Þetta er því bara mjög jákvætt," sagði Kolbeinn en viðtalið má sjá í heild sinni hér fyrir ofan eða með því að smella hér.

Kolbeinn kom til Ajax frá AZ Alkmaar nú í sumar og segir hann Ajax vera talsvert stærra félag. „Ajax er stórlið á evrópskan mælikvarða og stærsta liðið í Hollandi. Það er því munur á þessum tveimur félögum. AZ er mjög flottur klúbbur en Ajax er einn af þessum stóru og sér maður að það er smá munur þarna á milli."

„Liðsfélagarnir hafa tekið mér mjög vel og ég get ekki kvartað yfir neinu enda allt eins og best verður á kosið."

Ajax keppir í Meistaradeild Evrópu í vetur og lenti í riðli með Real Madrid, Lyon og Dinamo Zagreb. Hann bíður spenntur eftir að fá að kljást við það verkefni.

„Það verður gríðarlega spennandi, sérstaklega að fara á Bernabeu og spila á móti Real Madrid. Lyon er líka verðugur mótherji en þetta verður líka mjög erfitt gegn Dinamo Zagreb í Króatíu. Ég á von á því við munum keppa við Lyon og Zagreb um að komast áfram með Real Madrid. Við erum með gott lið og teljum að við eigum möguleika á að komast í 16-liða úrslitin."

Hann neitar því ekki að það er spennandi tilhugsun að fá að spila á móti stórliði Real Madrid á Santiago Bernabeu. „Um þetta hefur maður dreymt frá því að maður var lítill - sérstaklega að fá að spila á móti mönnum eins og Cristiano Ronaldo sem er einn besti knattspyrnumaður heims."

Kolbeinn fær þó væntanlega það verkefni að glíma við varnarmenn Real, eins og Portúgalann Pepe sem er afar umdeildur. „Pepe er harður í horn að taka og maður fær kannski eitthvað að taka á honum. Það verður bara gaman að fá að glíma við þessa kappa."