Umfjöllun dagblaða um enska boltann í hættu

Svo gæti ferið að dagblöð í Englandi og alþjóðlegar fréttaveitur fái ekki að fjalla um enska boltann þar sem að viðræður þeirra við forráðamenn ensku deildanna ganga illa.

Skrifandi blaðamenn og ljósmyndarar hafa starfað samkvæmt samkomulagi sem náði aftur til ársins 2003 en þykir í dag úrelt. Viðræður um nýjan samning við forráðamenn ensku úrvalsdeildarinnar og neðri deildanna hafa staðið yfir í marga mánuði en hefur nú verið hætt, aðeins nokkrum dögum áður en keppni hefst á ný í Englandi.

Um helgina verður spilað í neðri deildunum og keppni í ensku úrvalsdeildinni hefst svo um þarnæstu helgi. Svo gæti farið að blaðamenn og ljósmyndarar frá enskum dagblöðum og alþjóðum fréttaveitum eins og Reuters, AP og AFP, fái ekki að starfa á leikjunum.

Forráðamenn deildanna vilja setja ákveðin takmörk á umfjöllunina. Til dæmis hversu fljótt viðkomandi miðlar geta birt ljósmyndir úr leiknum á internetinu, auk hvernig beinum lýsingum frá vellinum sé háttað.

„Þeir lögðu fram sextán síðna skjal sem fjallar um alls konar takmarkanir. Til dæmis hvenær og hvernig efni er miðlað til áhugamanna um knattspyrnu hér heima og erlendis,“ sagði í yfirlýsingu frá samtökum fjölmiðlafyrirtækjanna.

„Í mörgum tilfellum vilja þeir að notendur greiði sérstaklega fyrir aðgengi að upplýsingum um leikina.“

Forráðamönnum fjölmiðla finnst ekki eðlilegt að takmörk séu sett á umfjöllun þeirra, sérstaklega þar sem að samskiptatækni hefur fleygt fram á undanförnum misserum með tilkomu samskiptasíðna á borð við Twitter og Facebook.

Þetta er alls ekki í fyrsta sinn sem fjölmiðlar lenda í útistöðum við knattspyrnuyfirvöld í Englandi. Í fyrra meinaði Southampton ljósmyndurum aðgengi að leikjum sínum. Þess í stað yrðu fjölmiðlar að kaupa ljósmyndir af ljósmyndurum félagsins sem einir fengu að starfa á leikjunum.

Þetta tóku fjölmiðlar illa í og brugðu margir á það ráð að birta skopmyndir í stað ljósmynda eða breyta umfjöllun sinni á annan hátt. Forráðamenn Southampton drógu í kjölfarið bannið til baka.