Guðmundur Steinarsson: Hallaði á okkur í dómgæslunni

Keflvíkingar voru langt því frá að vera sáttir við dómgæsluna í leik sínum gegn Þór á Þórsvellinum í kvöld en Þórsarar tryggðu sér 2-1 sigur á lokamínútunum.

„Það er dæmt af okkur fullkomlega löglegt mark í seinni hálfleik og það sáu það allir sem horfðu á þennan leik að það hallaði á okkur á dómgæslunni hér í kvöld,” sagði Guðmundur Steinarsson, reynsluboltinn í liði Keflavíkur sem var mjög ósáttur eftir leik.

Keflvíkingar voru jafnframt ósáttir við að Atli Sigurjónsson, leikmaður Þórs skyldi ekki fá rautt spjald fyrir harkalega tæklingu á Viktori Smára Hafsteinssyni.

„Þú getur rétt ímyndað þér að við erum ósáttir við það, maðurinn á reyndar eftir að fara í myndatöku en þetta leit illa út og var agalegt að sjá. Þetta var hreinlega leikurinn í hnotskurn, það féll ekkert með okkur,” sagði Guðmundur.

Guðmundur bætti við að lokum: „Mér fannst bæði lið reyna að spila fótbolta í fyrri hálfleik og uppskera sitthvort markið. Í seinni hálfleik leystist þetta hreinlega upp í vitleysu og það er bara eitt sem kemur til þar, dómarinn og hann á að hafa stjórn á leiknum en stjórnin var einfaldlega ekki nógu góð í dag.”