Savic til City - Arsenal vildi hann ekki

Enska úrvalsdeildarfélagið Manchester City heldur áfram að styrkja varnarlínu liðsins. Stefan Savic, tvítugur Svartfellingur, hefur samið við félagið til fjögurra ára. Hann reyndi fyrir sér hjá Arsenal á síðasta ári en Arsene Wenger sá ekki ástæðu til þess að bjóða honum samning.

„Ég horfi reglulega á ensku úrvalsdeildina og ég veit að þetta er áhugaverðasta deildin þannig að nú vil ég aðstoða félagið við að ná árangri. Leikvangurinn er stórkostlegur og ég hef séð í sjónvarpinu hversu ástríðufullir stuðningsmennirnir eru,“ sagði Savic í viðtali við heimasíðu City.

Savic sem hefur spilað sex landsleiki fyrir Svartfjallaland hefur fengið atvinnuleyfi og því klár í slaginn.

Fyrr í mánuðinum gekk City frá kaupum á vinstri bakverðinum Gael Clichy frá Arsenal auk þess sem franski landsliðsmaðurinn Samir Nasri er sterklega orðaður við félagið.