Messi ætlar sér stóra hluti með Argentínu á heimavelli

Flautað verður til leiks í Copa America keppninni í Argentínu á morgun þegar heimamenn í Argentínu mæta Bólivíu í Buenos Aires. Argentína hefur komist í úrslit keppninnar í tvö síðustu skipti en í bæði skiptin beðið lægri hlut fyrir Brasilíu. Lionel Messi og félagar ætla sér að fara alla leið í keppninni í ár enda á heimavelli.

„Ég hef unnið allt sem hægt er að vinna með Barcelona og sömuleiðis sem einstaklingur. Nú er markmið mitt að vinna Copa America með argentínska landsliðinu," sagði Messi við fjölmiðla þegar hann kom til móts við landsliðið fyrr í þessum mánuði.

Argentínska liðið þótti til alls líklegt á mótinu fyrir fjórum árum í Venesúela. Allar helstu stjörnurnar voru mættar til leiks en þrátt fyrir það tapaði liðið fyrir vængbrotnu liði Brasilíu 3-0 í úrslitaleik. Veron, Messi og Tevez áttu engin svör við Robinho, Elano og Julio Baptista.

Landslið Argentínu hefur ekki unnið stórmót síðan árið 1993. Raunar hefur landsliðinu aðeins tekist að sigra Mexíkó í úrsláttarkeppni HM síðan 1990 ef sigrar í vítaspyrnukeppnum eru ekki taldir með. Með sigri verður Argentína sigursælasta þjóðin í sögu keppninnar en í dag deila þeir nafnbótinni með Úrúgvæ.

Aðeins eitt væri verra en að Argentínu tækist ekki að standa uppi sem sigurvegari. Sigur Brasilíu, erkifjenda Argentínumanna. Það yrði þriðji sigur Brasilíu í röð í keppninni sem þætti saga til næsta bæjar. Eftir fall stórliðs River Plate úr efstu deild, þar sem liðið vann ekki í síðustu níu leikjum tímabilsins, er fátt sem kemur Argentínumönnum lengur á óvart.

Tólf lið mæta til leiks í Argentínu en auk tíu Suður-Ameríku þjóða er tveimur þjóðum ávalt boðið að taka þátt. Gestaþjóðir mótsins í ár eru Javier Hernandez og félagar frá Mexíkó auk Kosta Ríka. Upprunalega áttu Japanir að taka þátt en þeir þurftu að draga sig úr mótinu í apríl síðastliðnum. Jarðskjálftinn í Japan hafði orðið til þess að leikir í japönsku J-deildinni þurftu að spilast á sama tíma og mótið fer fram.

Allir leikir Copa America verða sýndir í beinni útsendingu á Stöð 2 sport og má sjá leikjadagskrána hér.