Ljótir hrúgast inn á stefnumótasíðu fallega fólksins

Stefnumótasíðan BeautifulPeople.com þurfti í dag að gefa út tugi þúsunda afsökunabeiðna til ófríðs fólks sem hafði óvart verið veittur aðgangur að síðunni. Það var vírusinn Shrek sem tókst að valda þessum óþægindum en hann gerði það að verkum að allir sem sóttu um aðgang að síðunni voru samþykktir, óháð útliti þeirra.

Síðan tekur að jafnaði aðeins á móti einum af hverjum sjö umsækjendum en hver sá sem sækist eftir því að verða hluti af þessu snoppufríða stefnumótasamfélagi þarf fyrst að gangast undir strangt mat þar sem notendur síðunnar kjósa um það hvort viðkomandi sé nógu fallegur.

Framkvæmdastjóri síðunnar sagði grunsemdir hafa tekið að vakna þegar þúsundir nýrra meðlima höfðu bæst við á einungis sex vikum, sem margir hverjir hafi ekki verið neitt "olíumálverk". Aðstandendur BeautifulPeople.com hafa þó brugðist snögglega við og nú munu þeir 30,000 umsækjendur sem samþykktir voru af vírusnum þurfa að ganga í gegnum harkalegar kosningar þar sem flestum þeirra verður hafnað.

Bandaríkin, Danmörk og Frakkland eru fallegustu löndin ef marka má þjóðernisskiptingu meðlima síðunnar, en það eru Bretar, Rússar og Pólverjar sem virðast eiga vinninginn þegar það kemur að hæsta hlutfalli höfnunar.