Gert að greiða fyrir kannabisræktun hjóna

Dómari í Nova Scotia í Kanada hefur úrskurðað að bæjaryfirvöldum sé skylt að greiða fyrir kannabisræktun hjóna vegna þess að þau hafa ekki efni á því að halda úti eigin ræktun.

Hjónin hafa ekki efni á því að koma sér upp almennilegum aðstæðum til þess að rækta eigið kannabis, sem þau reykja vegna veikinda. Eiginmaðurinn er með gláku en konan lenti í bílslysi fyrir nokkru.

Kannabis er löglegt í Kanada sé þess neytt af læknisástæðum. Hjónin uppfylla þau skilyrði samkvæmt CBS fréttastofunni og breska ríkisútvarpið greinir frá.

Sveitafélaginu er gert að greiða hjónunum tæplega 300 þúsund íslenskar krónur svo þau geti komið sér upp sæmilegri ræktunaraðstöðu. Þá er sveitarfélaginu einnig gert að greiða hjónunum hundrað kanadíska dollara á þriggja mánaða fresti til þess að viðhalda ræktuninni.

Talsmaður sveitarfélagsins segir að ekki sé búið að taka ákvörðun hvort málinu verði áfrýjað.