Gúrkur í geimnum sem ekki má borða

Gúrkur verða ræktaðar um borð í geimfari sem leggur af stað á sporbraut um jörðina á morgun, miðvikudaginn 8. júní, en geimförunum verður hinsvegar stranglega bannað að leggja þær sér til munns sökum e-coli veirunnar sem sýkt hefur grænmeti í Evrópu undanfarið.

Ætlunin með ræktuninni er að skoða möguleika geimkönnuða framtíðarinnar á því að rækta sinn eigin mat, en þó svo geimfarinu sé skotið upp frá Kasakstan, sem er ekki í sömu heimsálfu og e-coli faraldurinn, eru engar áhættur teknar þegar það kemur að heilsufari mannanna.

Geimfararnir, sem allir hafa miklum skyldum að gegna á meðan ferðinni stendur, verða aðeins þrír í geimfarinu í sex mánuði og verður aðgangur þeirra að læknisþjónustu því skiljanlega takmarkaður. Þeir hafa þar af leiðandi verið í strangri einangrun undanfarna daga og verða þar alveg fram að brottför. Það verður síðan bara að koma í ljós hversu vel þeim tekst að hemja löngunina í ferskar agúrkur eftir margra mánuða geimfæði.