Móðir Brynjars: Ekki dæma hann fyrr en hann verður dæmdur

„Brynjar hefur búið hjá mér alveg þangað til hann fór til Taílands og ég þekki hann eins og hendina á mér, ég veit alveg hvernig hann hugsar," segir Borghildur Antonsdóttir, móðir Brynjar Mettinissonar sem situr í gæsluvarðhaldi í Bangkok grunaður um fíkniefnamisferli. Hún trúir á sakleysi sonar síns og segir að hann myndi aldrei taka þátt í einhverju ólöglegu athæfi.

Í Fréttablaðinu í morgun kom fram að Brynjar hafi útvegað arabískum manni, sem hann hafði verið í samskiptum við á netinu, burðardýr sem flytja átti einn lítra af metamfetamíni í vökvaformi til Japans. Þegar hann hafi mætt á hótelið með burðardýrið að hitta mennina kom í ljós að burðardýrið var rannsóknarlögreglumaður og var Brynjar og arabíski maðurinn handteknir.

Þekkir engan í Japan

Móðir Brynjars, segir þessi sögu ekki vera rétta. Hún segist hafa fengið það á hreint í dag frá aðalræðismanni Íslands í Taílandi að Brynjar hafi ekki verið með neina peninga og ekki fengið neina peninga, en samkvæmt frétt Fréttablaðsins, átti Brynjar að fá 2.500 Bandaríkjadali fyrir viðvikið, tæpar 290 þúsund krónur.

Borghildur segir að ræðismaðurinn hafi sagt að Brynjar hafi farið á hótelið til að hitta Arabann sem ætlaði að útvega honum vinnu. „Þegar hann kom þangað hafi þeir ætlað að plata hann til að fara með einhver lyf til Japans. Hann hefði aldrei farið með lyf til Japans, hann hefur aldrei komið þangað, talar ekki japönsku og þekkir engan í Japan. Ég veit að hann myndi aldrei fara þangað með lyf," segir Borghildur sem segir að lyfin hafi átt að vera töflur sem framkalli fósturlát hjá ófrískum konum.

Virðist sem sonur þinn sé saklaus og hafi verið plataður

Borghildur segir aðspurð að Brynjar hafi ekki útvegað burðardýr. „Ég spurði ræðismanninn að þessu og hann sagðist ekki hafa heyrt um þetta. Hann sagði að það væru margar sögur í gangi og vissi ekki hver væri að segja þetta," segir hún. Og hún trúir á sakleysi sonar síns. „Ég er alveg viss um það, eins ræðismaðurinn sagði við mig í dag: Sonur þinn virðist vera mjög saklaus og það virðist sem hann hafi verið plataður í eitthvað. Það er það sem ég hef verið að segja allan tímann, því hann trúir því að enginn sé slæmur, ég hef alltaf verið að segja við hann að hann megi ekki vera svona trúgjarn og halda að allir séu svona góðir," segir hún.

Mun segja sögu sína sjálfur

Og hún vonar að Brynjar geti sagt sögu sína þegar hann verður frjáls maður. „Eins og ég sagði við einn sem var að sletta á okkur; Ekki dæma hann fyrr en hann verður dæmdur, maður verður að sjá heildarmyndina fyrst, hver er sekur og hver ekki. Þegar þetta er komið á hreint og við vitum nákvæmlega hvað er að ske, þá mun Brynjar gefa sjálfur viðtal, ég er alveg viss um það. Hann á eftir að þakka þeim sem hafa hjálpað sér og hann mun segja sannleikann," segir hún að lokum.