Umfjöllun: Garðar tryggði Stjörnunni sigur á Akureyri

Stjarnan sótti þrjú stig til Akureyrar í þriðju umferð Pepsi-deildar karla í kvöld. Liðið lagði Þór 0-1 með marki Garðars Jóhannssonar úr vítaspyrnu.

Stjörnumenn byrjuðu leikinn betur og Garðar Jóhannsson átti meðal annars skot eftir aðeins ellefu sekúndur. Það var þó laust og beint á Srjadan Rajkovic í markinu.



Stjörnumenn héldu boltanum ágætlega innan liðsins og reyndu að spila sig fram völlinn en áttu þó nokkrar langar sendingar fram á Garðar. 

Stjörnumenn sóttu mun meira en gekk illa að skapa sér færi.

Srjadan varði ágætlega frá Garðari eftir hálftíma leik en annars var lítið um færi.

Þórsarar virkuðu stressaðir og negldu boltanum oft fram án minnsta tilefnis. Vörnin var óskipulögð en Garðar gerði henni lífið leitt.

Hann lét finna vel fyrir sér fremst.

Þórsarar voru hvað eftir annað rangstæðir, alls tíu sinnum.

Þeir voru lengi að vakna en áttu ágætan sprett undir lok fyrri hálfleiks, án þess þó að skapa sér færi.

Hugsanlega má kalla það hættu við mark Stjörnunnar þegar boltinn var laus í teignum undir lok hálfleiksins en Þórsarar áttu ekkert skot að marki í fyrri hálfleiknum.

Fyrri hálfleikur var markalaus og lítið spennandi.



Þórsarar fengu dauðafæri í upphafi seinni hálfleiks þegar Sveinn Elías komst einn gegn Magnúsi eftir góða sendingu frá Atla en skot hans fór yfir markið.

Skömmu síðar kom fyrsta markið. Eftir fyrirgjöf fór boltinn í hendina á Atla Jens og Þorvaldur dæmdi réttilega víti. Úr spyrnunni skoraði Garðar örugglega.



Þórsarar reyndu hvað þeir gátu til að sækja og spila boltanum. Stjarnan pressaði mjög vel og tóku Þórsara þar á eigin bragði. Akureyringarnir voru þekktir fyrir það í fyrra að pressa vel og vinna boltann ofarlega á vellinum. Það gekk ekki í dag.



Stjörnumenn sigldu sigrinum heim og var sigurinn sanngjarn. Þórsara vantaði að klára færin en Garðar gerði gæfumuninn fyrir Stjörnuna í dag.

Þór – Stjarnan 0-1

0-1 Garðar Jóhannsson (56.)

Þórsvöllur. Áhorfendur: 1086

Dómari: Þorvaldur Árnason (7)

Skot (á mark): 3–11 (2-6)

Varin skot: Srdjan 5 – Magnús 2

Hornspyrnur: 7–7

Aukaspyrnur fengnar: 11–14

Rangstöður: 14–2

Þór (4-3-3):

Srdjan Rajkovic 7

Gísli Páll Helgason 4

Atli Jens Albertsson 4

Þorsteinn Ingason 5

Aleksandar Linta 6

(46. Ingi Freyr Hilmarsson 5)

Janez Vrenko 6

(72. Ármann Pétur Ævarsson -)

Gunnar Már Guðmundsson 6

Atli Sigurjónsson 6

Sigurður Marinó Kristjánsson 4

(72. David Disztl -)

Sveinn Elías Jónsson 5

Jóhann Helgi Hannesson 5

Stjarnan (4-2-3-1):

Magnús Karl Pétursson 7

Jóhann Laxdal 6

Daníel Laxdal 6

Nikolaj Hagelskjaer Pedersen 7

Hörður Árnason 6

Björn Pálsson 6

Þorvaldur Árnason 6

Aron Grétar Jafetsson 5

(75. Bjarki Páll Eysteinsson -)

Jesper Jensen 6

Halldór Orri Björnsson 6

(46. Víðir Þorvarðarson 5)

Garðar Jóhannsson 7* ML