Þórarinn Ingi: Okkar mottó er að gefast aldrei upp

Þórarinn Ingi Valdimarsson var hetja Eyjamanna í kvöld þegar hann tryggði liðinu 1-0 sigur á Val með stórkostlegu skoti utan teigs þegar 90 mínútur voru nýkomnar upp á vallarklukkuna.

„Þetta gerist ekki sætara en þetta en þetta er jafnframt í annað skiptið á tímabilinu sem við klárum leik svona og það er bara frábært," sagði Þórarinn Ingi en Tryggvi Guðmundsson tryggði ÍBV 1-0 sigur á Fram í 1. umferð með marki á 93. mínútu.

„Ég held að ég hafi ekki skorað sætara mark en maður skorar nú ekki mörg mörk og þegar boltinn dettur loksins inn hjá manni þá er bara ágætt að gera þetta svona," sagði Þórarinn kátur en ÍBV-liðið var manni færri allan seinni hálfleikinn.

„Við spiluðum vel eftir að við misstum manninn útaf og vorum ekki að gefa mikið af færum á okkur. Við leyfðum þeim að koma boltanum fyrir en ætluðum bara að vinna boltann í loftinu. Við spiluðum frábærlega í seinni hálfleik og það gekk allt upp. Við gefumst aldrei upp og það er mottóið okkar. Við ætlum að klára alla leiki af fullum krafti og það skilaði okkur þremur stigum ídag," sagði Þórarinn.

„Þetta er fínn völlur til þess að starta tímabilinu almennilega. Við vorum ekki að spila sannfærandi í fyrstu tveimur leikjunum en nú erum að sýna það að við getum þetta alveg. Það var upphafið að einhverju góðu þegar við náðum stigi hér á móti þeim í fyrra manni færri og af hverju ekki núna," sagði Þórarinn en ÍBV náði 1-1 jafntefli á móti Val á Vodafone-vellinum á svipuðum tíma í fyrra þrátt fyrir að missa mann af velli snemma í fyrri hálfleik.