Úrskurðaður í gæsluvarðhald

13. maí 2011 14:10

Gæsluvarðhaldskrafa yfir manninum sem játað hefur að hafa orðið barnsmóður sinni að bana í gær var tekin fyrir í Héraðsdómi Reykjaness nú rétt fyrir tvö. Dómari féllst á kröfuna og hefur maðurinn verið úrskurðaður í varðhald til 27. maí næstkomandi. Yfirheyrslur fóru fram yfir manninum í gærkvöldi og stóðu þær fram eftir nóttu.

Maðurinn kom á Landspítalann í Fossvogi í gærkvöldi og tilkynnti starfsfólki spítalans að lík konunnar væri í skottinu. Farið hefur verið fram á að maðurinn sæti geðrannsókn.

Lögregla telur að konan hafi verið dáin áður en bílnum var ekið að spítalanum. Ekki er ljóst hvort konan lést í bílnum eða annars staðar en lögregla veit að hún og maðurinn áttu leið um Heiðmörk skömmu áður.

Tengdar fréttir

Játaði að hafa banað stúlku um tvítugt - vísaði sjálfur á líkið

Kona um tvítugt fannst látin í farangursgeymslu bifreiðar við Landspítalann í Fossvogi á áttunda tímanum í kvöld.

12. maí 2011 21:45

Þekkti fórnarlambið

Maðurinn sem játaði að hafa orðið konu að bana í kvöld þekkti fórnarlamb sitt. Maðurinn, sem er 25 ára gamall og búsettur á höfuðborgarsvæðinu, ók bifreið sinni að Landspítalanum í Fossvogi á áttunda tímanum í kvöld.

12. maí 2011 23:24

Var með barnið í bílnum

Maðurinn sem játaði í gær að hafa orðið barnsmóður sinni að bana var, eftir því sem næst verður komist, með barn þeirra í bílnum þegar hann framdi voðaverkið. Heimildir fréttastofu herma að áður en hann fór með lík konunnar á Landspítala í Fossvogi í gærkvöldi, hafi hann farið með barnið heim til foreldra sinna.

13. maí 2011 13:59