Umfjöllun: Sanngjarn sigur Fylkis gegn Val

Fylkismenn unnu 2-1 baráttusigur á Valsmönnum í Lautinni í Árbænum í kvöld. Þórir Hannesson og Albert Brynjar Ingason komu Fylki í 2-0 áður en bakvörðurinn Jónas Tór Næs minnkaði muninn með skallamarki í lok leiksins.

Sigur Fylkis var sanngjarn þar sem þeir voru beittari í aðgerðum sínum og sköpuðu sér hættulegri færi. Valsarar voru hins vegar bitlausir fram á við og fundu ekki leiðina í markið fyrr en of seint. Fylkismenn eru með sigrinum komnir í hóp efstu liða deildarinnar með sjö stig en Valsmenn koma skammt undan með sex stig.

Fylkisvöllur á enn töluvert í land með að verða tilbúinn fyrir yfirstandandi leiktíð. Leikmenn fundu fyrir því og erfiðlega gekk að halda boltanum innan liðsins. Fylkismenn voru grimmari og óhræddir við að láta vaða á markið. Valsmenn komu sér oft í ágætis stöður en náðu ekki að leggja boltann nógu vel fyrir sig og átti Fjalar Þorgeirsson markvörður Fylkis nokkuð náðugan dag.

Eftir að hafa tapað unnum leik gegn Grindavík í fyrstu umferð hafa Fylkismenn náð í sjö stig úr síðustu þremur leikjum og líta vel út. Ástæða til bjartsýni í Árbænum. Ásgeir Börkur Ásgeirsson kom inn í liðið í stað Baldurs Bett sem er meiddur og átti fínan dag líkt og flestir í liðinu. Ásgeir hefur nú tekið út þriggja leikja bann sitt og kærkominn liðsstyrkur á miðjuna. Varnarlínan hélt virkilega vel í kvöld og gerðu sóknarmönnum Vals erfitt fyrir. Þá er Albert Brynjar Ingason kominn með þrjú mörk í fjórum leikjum. Albert er eldfljótur og skapaði oft hættu í leiknum með hraða sínum.

Valsmenn hafa á hinn bóginn tapað tveimur leikjum í röð. Þeir söknuðu meiðslapésanna Arnars Sveins Geirssonar og Hauks Páls Sigurðssonar í leiknum í kvöld. Sigurbjörn Hreiðarsson og Jón Vilhelm Ákason sem komu inn í liðið í þeirra stað eru fínir knattspyrnumenn en náðu ekki að fylla í skarðið í þessum leik. Hörður Sveinsson var í góðri gæslu hjá varnarmönnum Fylkis í kvöld. Hörður á enn eftir að skora sitt fyrsta mark í sumar og vonandi fyrir Valsmenn að það komi fyrr en síðar.

Nánar um leikinn í textalýsingu hér að neðan.

Tölfræðin í leiknumFylkir-Valur 2-1

1-0 Þórir Hannesson (21.)

2-0 Albert Brynjar Ingason (69.)

2-1 Jón Tór Næs (90.)

Áhorfendur: 1463

Dómari: Örvar Sær Gíslason 7.

Skot (á mark): 11-10 (4-6)

Varin skot: Fjalar 5 – Haraldur 2

Horn: 7-4

Aukaspyrnur fengnar: 15-8

Rangstöður: 3-5

Fylkir (4-3-3)

Fjalar Þorgeirsson 6

Þórir Hannesson 7

Kristján Valdimarsson 7

Valur Fannar Gíslason 7

Tómas Þorsteinsson 6

Ásgeir Börkur Ásgeirsson 6

Gylfi Einarsson 6

Andrés Már Jóhannesson 7

(88. Davíð Þór Ásbjörnsson)

Ingimundur Níels Óskarsson 7

Jóhann Þórhallsson 6

(79. Andri Már Hermannsson)

Albert Brynjar Ingason 7

Valur (4-4-2)

Haraldur Björnsson 6

Jónas Tór Næs 6

Atli Sveinn Þórarinsson 5

Halldór Kristinn Halldórsson 5

Pól Jóhannus Justinussen 5

(56. Andri Fannar Stefánsson 5)

Matthías Guðmundsson 6

Sigurbjörn Örn Hreiðarsson 5

Guðjón Pétur Lýðsson 6

Jón Vilhelm Ákason 6

(73. Þórir Guðjónsson)

Christian R. Mouritsen 5

(46. Rúnar Már S Sigurjónsson 5 )

Hörður Sveinsson 5