Ólafur Örn: Þeir voru betri á öllum sviðum leiksins

Ólafur Örn Bjarnason spilandi þjálfari Grindvíkinga var hundfúll með sína menn eftir 0-2 tap gegn Valsmönnum á heimavelli í kvöld.

„Við erum auðvitað allir mjög ósáttir við þennan leik. Ég og leikmennirnir erum sammála um það að þetta sé svona leikur sem við þurfum að gleyma sem fyrst og koma svona taptilfinningu út úr hausnum á okkur," sagði Ólafur Örn.

„Aðstæðurnar voru erfiðar. Völlurinn og rokið var erfitt viðureiganar og þegar svo er þá vinnur oft liðið sem beitir meiri hörku og baráttu. Við vorum ekki tilbúnir í baráttu. Þeir voru harðari en við og hlupu meira. Þegar rokið er svona þarf að nota meira en bara fótboltahæfileikana," sagði Ólafur Örn.

„Fyrst þarf að berjast og þá munu fótboltahæfileikarnir frekar koma í ljós. Það er samt hægt að orða það þannig að þeir voru bara betri en við á öllum sviðum leiksins og þess vegna unnu þeir í dag. Við munum þrátt fyrir lélegan leik í kvöld mæta tilbúnir í slaginn í næsta lek gegn Breiðablik. Það þýðir ekkert annað," sagði Ólafur að lokum.