Geðlæknir: Axel hefur ekkert í fangelsi að gera

Yfirlæknir á geðsviði Landspítalans segir að maðurinn sem varð sambýliskonu sinni að bana í maí síðastliðnum sé auglóslega mjög veikur einstaklingur sem ekki eigi heima í fangelsi. Héraðsdómur Reykjaness komst að þeirri niðurstöðu í morgun að maðurinn sé ósakhæfur.

Maðurinn, Axel Jóhannsson, veittist að sambýliskonu sinni í Heiðmörk tólfta maí síðastliðinn og þrengdi að hálsi hennar með þeim afleiðingum að hún lést. Með í för var barnungur sonur þeirra.

Í kjölfar atburðarins hélt maðurinn á bráðamóttöku Landspítalans þar sem hann tilkynnti starfsfólki að hann væri með lík í farangsgeymslu bifreiðar sinnar. Starfsfólk spítalans fann konuna þar látna.

Maðurinn var sýknaður í morgun af refsikröfu fyrir manndráp en er gert að sæta öryggisgæslu á viðeigandi stofnun.

„Eins og því er lýst í dómnum í dag er þetta augljóslega mjög veikur maður sem gerir sér ekki grein fyrir því hvað hann var að gera þegar hann fremur verkið. Og hann hefur ekkert í fangelsi að gera," segir Tómas Zoëga, yfirlæknir á geðsviði Landspítalans.

Geðlæknir sem skoðaði manninn segir að hann hafi lengi verið með geðrofseinkenni sem eru þess meðal annars valdandi að hann heyri skipandi raddir, en maðurinn segir að raddirnar hafi skipað honum að kyrkja sambýliskonu sína.

Maðurinn var einnig ákærður fyrir líkamsárás en hann réðist á starfskonu í leikskóla í apríl síðastliðnum og sló hana þungu höggi aftan á höfuð. Hann leitaði sér geðrænnar aðstoðar í kjölfarið.

Jafnframt var maðurinn dæmdur til að greiða syni sínum og þeirrar látnu sex komma 6,2 milljónir króna og foreldrum konunnar 3,5 milljónir króna í bætur.

Dómarinn í málinu sagði i úrskurði sínum að ljóst þyki að verknaður mannsins hafi valdið foreldrum hinnar látnu miklu andlegu áfalli og muni að öllum líkindum valda þeim langvarandi andlegri áþján.

Þá þyki ljóst að sonur mannsins muni þurfa að takast á við og lifa með þeirri erfiðu og sársaukafullu staðreynd að faðir hans hafi orðið móður hans að bana.