Formaður Víkings: Nokkrar ástæður fyrir þessu

Björn Einarsson, formaður knattspyrnudeildar Víkings, vildi ekki tilgreina með nákvæmum hætti þær ástæður sem lágu að baki þeirrar ákvörðunar að reka Leif Garðarsson, þjálfara meistaraflokks karla.

Tilkynning var send fjölmiðlum nú síðdegis þar sem greint var frá þessu. Undanfarna daga og vikur hafa ýmis mál Víkinga ratað í fjölmiðla, til að mynda þegar frægt Excel-skjal með umsögnum Leifs um allan leikmenn sem var óvart sent á leikmannahópinn í tölvupósti.

Svo í dag var birtur pistill á fótbolti.net þar sem spurt er hver huldumaðurinn Albert Örn sé. Sá virðist haft þann eina tilgang að koma Leifi Garðarssyni til varnar í netheimum, til að mynda á spjallsvæði á vef Víkings og á Facebook.

„Það eru ýmsar ástæður fyrir þessu og svona ákvörðun er ekki tekin nema að vel ígrunduðu máli," sagði Björn í samtali við Vísi í dag. „Það eru ákveðnar ástæður sem liggja að baki og engin ein frekar en önnur. Þetta var ákvörðun tekin með hagsmuna Víkings að leiðarljósi."

Nú er Excel-málið nýkomið upp og í dag var birtur pistill á Fótbolti.net um huldumanninn Albert Örn. Gefur tímasetning þessarar ákvörðunar ekki til kynna að ákvörðun ykkar tengist þeim málum með beinum hætti?

„Þegar maður er að reka jafn öflugt félag eins og Víking skiptir félagið fyrst og fremst máli - ekki umræðan úti í bæ eða í fjölmiðlum. Mér finnst að Víkingur hafi verið í umræðunni á ósanngjarnan málta og það spilar rullu í þessu öllu en það eru margar aðrar ástæður að baki þessu. Við teljum að þetta sé best fyrir Víking."

Hvernig tók Leifur fréttunum?

„Menn taka slíku aldrei vel. En Leifur er fagmaður og hefur skilað sínu inn til okkar. Hann kom okkur upp í úrvalsdeildina og við metum það mikils. Svona mál eru aldrei skemmtileg."

Nú eru tveir mánuðir í að Íslandsmótið hefjist, af hverju er þessi ákvörðun tekin núna?

„Það er ekki síst tekið í ljósi þess að það er stutt í mikilvægt mót. Við höfum sett okkur skýr markmið og kjósum að vinna eftir þeim."

Hefur gengi liðsins í vetur gefið tilefni til að segja þjálfarnum upp störfum?

„Nei, gengi liðsins gerir það ekki. Við höfum verið í miklum meiðslavandræðum og margir lykilmenn að koma til baka þessa dagana. Það eru margar ástæður fyrir þessu og miklu stærra samhengi á bak við ákvörðunina en 2-3 tiltekin mál. Víkingur er það eina sem skiptir máli og ákvörðunin er tekin með það að leiðarljósi."

Er leit hafin að nýjum þjálfara?

„Sú leit hófst um leið og þessu máli lauk. Við stefnum að því að vinna þá vinnu mjög hratt."