Heimir: Klaufar að nýta ekki færin

Heimir Guðjónsson er vanari því að vera í sigurliði á KR-vellinum. Sú varð ekki raunin í kvöld.

„Nei, ég held að FH hafi ekki tapað hér síðan ég var að spila. Við spiluðum góðan leik í rúmlega 60 mínútur en gáfum eftir og KR gekk á lagið og kláraði leikinn.“

FH-ingar voru sterkari aðilinn stóran hluta leiksins en sköpuðu sér ekki mörg dauðafæri.

„Ég vil nú meinan að við höfum fengið fín færi, víti er auðvitað gott færi og við vorum kannski klaufar að ná ekki að nýta eitthvað af þessu.“

Ólíkt flestum öðrum liðum er FH ekki á leiðinni í frí strax. Framundan er frestaður leikur gegn Þór sem hlýtur að koma sér vel.

„Jú engin spurning. Menn vilja aldrei fara í þriggja vikna pásu með tap á bakinu þannig að það er í sjálfu sér ágætt að fá þennan leik við Þór. En Þór var að vinna ÍBV þannig að það er ljóst að það verður erfiður leikur.“