Ef við hefðum unnið fleiri leiki værum við meistarar

Sir Alex Ferguson, stjóri Man. Utd, sagði í gær að hann ætlaði ekki að kvelja sig á því hvar United hefði tapað stigum í vetur færi svo að liðið sæi á bak enska meistaratitlinum um næstu helgi.

Wayne Rooney er aftur á móti byrjaður að kvelja sjálfan sig og hann kennir óstöðugleika um gengi Man. Utd í vetur.

„Ef við hefðum verið stöðugri í okkar leik í vetur og ekki tapað svona mörgum leikjum þá hefðum við unnið deildina," sagði skarpur Rooney.

„Lið eins og okkar á ekki að tapa sjö leikjum í deildinni. Tapið gegn Leeds í bikarnum var skelfilegt. Í Meistaradeildinni vorum við frekar óheppnir gegn Bayern. Ég hefði aldrei trúað því að við myndum tapa þeim slag og það var mjög erfitt að sætta sig við þá staðreynd."