Áfrýjun Keflvíkinga um undanþágu fyrir markmann líka hafnað

Það er nú orðið endanlega ljóst að Keflvíkingar fá ekki að fá Henrik Bödker lánaðan frá Þrótti, eins og félagið vildi gera. KSÍ neitaði Keflvíkingum um undanþágu, bæði framkvæmdastjórinn sem og Félagaskipta- og samninganefnd þangað sem Suðurnesjamenn áfrýjuðu.

Ómar Jóhannsson er meiddur og verður frá í rúman mánuð. Árni Freyr Ásgeirsson mun verja markið í næstu leikjum en hann er 18 ára gamall. Varamarkmaður hans er nýorðinn 16 ára.

"Við fengum bara sömu rök og síðast," sagði Þorsteinn Magnússon, formaður knattspyrnudeildar Keflavíkur við Vísi rétt í þessu.

Keflvíkingar höfðu talað við Henrik Bödker um að hann kæmi til liðsins og var hann búinn að samþykkja það.

"Við erum ekki sáttir en það er ekkert sem við getum gert úr þessu," sagði Þorsteinn.