Sendi tölvupóst og hengdi sig

Mark Madoff sonur svikahrappsins Bernards Madoff sendi tölvupóst rétt áður en hann hengdi sig á heimili sínu um helgina. Þar sagði hann meðal annars; „Enginn vill heyra sannleikann." Mark var 46 ára gamall. Hann og bróðir hans Andrew voru til rannsóknar vegna svikamyllunnar en engar ákærur hafa verið lagðar fram gegn þeim.

Bræðurnir unnu báðir í fjármálafyrirtæki föðurins en ekki í þeirri deild þar sem svikin fóru fram. Þeir hafa báðir haldið fram sakeysi sínu. Þaðvar tengdafaðir Marks sem kom að honum eftir sjálfsmorðið. Eiginkona hans sem var fjarverandi hafði áhyggjur af honum og bað föður sinn um að fara á vettvang.

Tveggja ára sonur þeirrra hjóna er sagður hafa verið í íbúðinni þegar Mark Madoff hengdi sig.

Bernard Madoff var dæmdur í 150 ára fangelsi fyrir að svíkja milljarða dollara út úr viðskiptavinum sínum.