Fimm vitorðsmenn handteknir í Pakistan

Yfirvöld í Pakistan hafa handtekið fimm menn sem grunaðir eru um að tengjast hinu misheppnaða sprengjutilræði í New York 1. maí þegar sprengju var komið fyrir í jeppa á Times Square. Tveimur dögum síðar var maður handtekinn á JFK flugvellinum á leið til Dubai. Maðurinn sem heitir Faisal Shahzad fæddist í Pakistan en hann fékk bandarískan ríkisborgararétt árið 2007.

Eric Holder, dómsmálaráðherra Bandaríkjanna hefur fullyrt að Shahzad hafi dvalið í fimm mánuði í herbúðum talibana í Pakistan við undirbúning áður en hann hélt til New York. Yfirvöld í Pakistan sögðu aftur á móti í fyrstu að það væri ekkert sem benti til þess að talibanar hefðu staðið á bak við hina misheppnuðu sprengjuárás.

Ekki liggur fyrir hvenær mennirnir voru handteknir en breska ríkisútvarpið fullyrðir að það hafi verið eftir að háttsettir bandarískir embættismenn heimsóttu Islamabad í byrjun vikunnar.