Gummi Ben: Þurfum á nýju blóði að halda

„Það eru allir leikir erfiðir fyrir okkur, við vissum það fyrir mót en það er engin afsökun fyrir þessu. Við áttum hrikalega lélegan kafla í seinni hálfleik sem skilar sér í því að við steinliggjum hér.  Maður tapar leikjum ef maður fær á sig fimm mörk og maður vinnur ekki leiki nema maður nýti færin sín, það hefur sýnt sig" sagði Guðmundur Benediktsson þjálfari Selfyssinga eftir 5-2 tap gegn Fylki í Árbænum.

„ Við hefðum getað komist yfir í fyrri hálfleik, við vorum ágætir sóknarlega en það þarf að nýta færin sín og okkur var grimmilega refsað fyrir það. "

Leikmenn Selfoss áttu slakan kafla í seinni hálfleik þar sem Fylkismenn skoruðu fjögur mörk á 20 mínútum og galopnaðist vörn Selfyssinga oft á tíðum.

„ Við vorum komnir 2-0 undir og við það opnast vörnin meira. Við erum ekki að fara að pakka í vörn þegar við eigum séns að skora og ná stigum út úr leiknum. Þar gefum við færi á okkur og maður jafnar ekki leiki þegar maður er kominn 5-0 undir. Við náðum þó að sýna smá lit undir lokin og skora tvö mörk en það þarf að sýna það í 90 mínútur, það dugar ekki að spila bara vel í fimm mínútur."

Nú er félagsskiptaglugginn opinn á Íslandi og eru Selfyssingar að fara að styrkja lið sitt samkvæmt Guðmundi, þeir eru búnir að hafa 6 manns á reynslu og ætla að reyna að styrkja liðið.

„Við þurfum svo sannarlega á nýju blóði að halda, það sýndi sig hér í kvöld og hefur sýnt sig að undanförnu að við þurfum að hressa upp á liðið. Ég er hinsvegar lítið að spá í því, það þarf að laga margt fyrir næsta leik og setja saman hóp fyrir það " sagði Guðmundur.