Bjóða strætisvagnabílstjórum þreföld laun

Norska fyrirtækið Tide Buss auglýsir eftir íslenskum strætisvagnabílstjórum í fullt starf. Kjör vagnstjóra í Noregi eru umtalsvert betri en hér á Íslandi. Sveinn Aðalsteinsson, fyrsti trúnaðarmaður vagnstjóra hjá Strætó Bs., telur því líklegt að margir íslenskir vagnstjórar íhugi vel þann möguleika að flytjast búferlum til Noregs til að keyra þar strætó.

Tide Buss birti auglýsingu í Fréttablaðinu í gær þar sem óskað er eftir „fleiri íslenskum strætisvagnabílstjórum" til starfsstöðvar fyrirtækisins í Bergen. Þar kom fram að hjá Tide Buss í Fana, sem er í suðurhluta Bergen, séu nú um 250 starfsmenn og að margir þeirra komi frá Íslandi.

Að sögn Sveins eru mánaðarlaun fyrir 40 stunda dagvinnu strætisvagnabílstjóra á Íslandi eru ríflega 200 þúsund krónur en mánaðarlaun fyrir 37 stunda dagvinnu í Noregi erum um 700 þúsund íslenskar krónur. „Þetta eru rúmlega þreföld okkar laun," segir Sveinn.

Vagnstjórar á Íslandi vinna gjarnan mikla yfirvinnu til að hafa í sig og á. Sveinn segir annað uppi á teningnum í nágrannalöndum okkar. „Í Evrópulöndunum er yfirvinna ekki heimiluð í þeim mæli sem hún er unnin á Íslandi. Þegar menn vinna yfirvinnu í Danmörku eða Noregi er hún tekin út í fríi. Reglan í Evrópu er að hámarks vinnutími er um 90 stundir á tveimur vikum," segir Sveinn. Algengt er að íslenskir vagnstjórar vinni fjörutíu til sextíu tíma í yfirvinnutíma á mánuði.

Þrátt fyrir kostina við að starfa í Noregi segir Sveinn að það sé oft hægara sagt en gert fyrir fólk að rífa sig upp með rótum og flytja í annað land. „Margir eiga hér íbúðir og hús og eru í raun í átthagafjötrum. Þeir geta hvergi farið," segir hann.

„Menn með stórar fjölskyldur eiga oft líka erfiðara með að fara. En ég er viss um að margir sem eru ungir og ekki með stóra fjölskyldu koma til með að skoða þessi mál mjög vel," segir Sveinn.