Völvan heldur mistæk - Spáir byltingu og illindum á nýju ári

Styrjaldarástand ríkir á Íslandi næsta árið, fólkið gerir byltingu - svo búsáhaldabyltingin verður sem barnaleikur einn. Hneyksli, logandi illindi, upplausn við stjórn landsins og kexverksmiðja er líklegri til að rísa í Helguvík en álver - segir hin bölsýna völva Vikunnar um árið 2011.

Jafnvel sumarið, verður varla nema þokkalegt. Það er sem sé ekki bjart yfir völvunni þessi áramótin - en hún reyndist að vísu ekki ýkja sannspá á öllum sviðum í fyrra:

Þegar hún sagði að: Snjóflóðin yrðu tvö, einu sem fréttastofa man eftir voru manngerð. Að ekkert eldgos yrði á árinu. Ekki orð um það meir. Ríkisstjórnin gæti fallið -og enn heldur hún. Þá var verðtryggingin ekki afnumin.

Og sprengjan sem völvan spáði að Davíð Oddsson kastaði inn í þjóðlífið í febrúar - sá febrúar leið án þess að Davíð léti á sér kræla.

En Ísland árið 2011 verður fremur ófrýnilegt í völvuspánni; óeirðir og læti, ríkisstjórnin springur, og arftaki hennar líka - fólkið gerir mikla byltingu, og mótmæli því að verið sé að hjálpa stóreignafólki og fyrirtækjum á meðan almúginn sé skuldsettur enn meir.

Fjórflokkurinn er ýmist í sárum eða logandi í innanflokksátökum, spáir völvan. Jóhanna hrökklast frá völdum. Hreyfingin fjarar út og nýtt framboð fólksins kemur fram - þar sem Lilja Mósesdóttir verður hugsanlega í forystuhópnum.

Eitt stærsta hneykslið verður tengt Finni Ingólfssyni og Ólafi Ólafssyni. Álver sér hún ekki á Bakka og á frekar von á kexverksmiðju en álbræðslu í Helguvík.

Áfram telur hún að verði stormasamt í kringum Jónínu Ben og Gunnar í Krossinum. En það kemur líklega fæstum á óvart.

Hér og þar örlar á bjartsýni; völvan spáir því til dæmis að miklir peningar finnist í þeirri fjársjóðsleit sem nú stendur yfir hjá sérstökum saksóknara.

En hún er ekki bjartsýn á gengi okkar í Eurovision - ólíkt því sem var í fyrra þegar hún taldi að verðugur karlmaður yrði fulltrúi Íslands og myndi hreppa eitt af fimm efstu sætunum. Fulltrúinn reyndist vera kona. Og hún endaði í nítjánda sæti.