Ljúka meirihlutaviðræðunum í Kópavogi á næstu dögum

Meirihlutaviðræður í Kópavogi ganga ljómandi vel, að sögn oddvita Vinstri grænna. Engar ákvarðanir hafa verið teknar varðandi bæjarstjórastólinn eða önnur embætti.

Meirihluti Sjálfstæðis- og Framsóknarflokks féll í kosningunum á laugardaginn og í framhaldinu hófu Samfylkingin, Vinstri grænir, Listi Kópavogsbúa og Næstbesti flokkurinn meirihlutaviðræður.

Klárast á næstu dögum

„Við höfum hist á hverjum degi og erum að klára að hnýta alla enda. Ég sé ekki annað en að þetta eigi að klárast á allra næstu dögum. Málaefnasamningurinn þarf svo að fara fyrir fundi hjá flokkunum," segir Ólafur Þór Gunnarsson, oddviti Vinstri grænna.

Í fyrradag kom upp ágreiningur hver ætti að taka við sem bæjarstjóri en eitt að stefnumálum Lista Kópavogsbúa er að ráðinn verði ópólitískur bæjarstjóri. Ásdís Ólafsdóttir, sem skipaði heiðursæti á Lista Kópavogsbúa og er fyrrverandi varabæjarfulltrúi Sjálfstæðisflokksins, sagði í samtali við Vísi að Samfylkingin gerði þá kröfu að Guðríður Arnardóttir, oddviti flokksins, yrði bæjarstjóri og á það gæti Lista Kópavogsbúa ekki fallist. Í framhaldinu sendu oddvitar framboðanna frá sér yfirlýsingu um að þeir stæðu sameiginlega að viðræðunum.

„Við náum mjög vel saman"



„Það er enginn með ófrávíkjanlegar kröfur í þessum viðræðum," segir Ólafur Þór. Hann á ekki von á að það verði vandamál þegar kemur að því að flokkarnir skipti með sér verkum. „Við erum auðvitað byrjuð að tala um það en við viljum að gera þetta þannig að við hnýtum alla hnúta áður en við kynnum hvernig við skiptum með okkur verkum."

Ólafur Þór segir að oddvitarnir nái mjög vel saman og það sé fínn andi í hópnum. „Þessi hópur er að stærstum hluta að hittast í fyrsta sinn og það er því eðlilegt að það taki tími að tala sig saman og skapa það verkleg og vinnuanda sem þarf til að klára svona verkefni. Við erum taka við bæjarfélaginu eftir 20 ára meirihluta sjálfstæðis- og framsóknarmanna og það þarf náttúrulega að gera þetta almennilega."