Hætta í stjórn vegna trúnaðarbrests

Formaður og varaformaður knattspyrnudeildar Vals hafa, ásamt formönnum meistaraflokksráðs og heimaleikjaráðs, látið af stjórnarstörfum fyrir Val. Deilur innan stjórnar og trúnaðarbrestur er ástæða þess að fjórmenningarnir segja af sér.

Í yfirlýsingu frá fjórum stjórnarmönnum knattspyrnudeildar Vals, þeim Berki Edvardssyni, Jóni Grétari Jónssyni, Braga G. Bragasyni og Jóni Höskuldssyni, kemur fram að trúnaðarbrestur milli knattspyrnudeildar Vals og aðalstjórnar félagsins sé ástæða þess að þeir segi af sér stjórnarmennsku. Þeir segja jafnframt að innan félagsins hafi margt gengið á, ákveðnir einstaklingar hafi reynt að skemma fyrir störfum þeirra og slík vinnubrögð séu knattspyrnufélaginu Val ekki til framdráttar.

Formaður og varaformaður knattspyrnudeildar Vals hafa, ásamt formönnum meistaraflokksráðs og heimaleikjaráðs, látið af stjórnarstörfum fyrir Val. Börkur Edvardsson er því hættur sem formaður knattspyrnudeildar Vals en Friðjón R. Friðjónsson tekur við formennsku af honum.

Mikið hefur gustað utan vallar hjá Val að undanförnu eftir fréttaflutning um að staða Gunnlaugs Jónssonar sem þjálfari karlaliðs félagsins væri ekki traust. Yfirlýsing fjórmenninganna rennir stoðum undir það. Í yfirlýsingunni þakka fjórmenningarnir fjölda fólks sem lagt hefur þeim lið en það stingur í augun að Gunnlaugur Jónsson er ekki þar á meðal.

„Á þessum tímamótum langar okkur að þakka þeim fjölmörgu Valsmönnum sem hafa starfað með okkur og félaginu að því mikla uppbyggingarferli sem hefur átt sér stað undanfarin ár innan knattspyrnudeildarinnar. Við erum afar stoltir að hafa byggt upp sterkasta meistaraflokk kvenna í sögu félagsins og þökkum bæði fyrrverandi og núverandi þjálfurum þeim, Elísabetu Gunnarsdóttur og Frey Alexanderssyni fyrir frábært samstarf. Við erum einnig þakklátir Willum Þór Þórssyni sem þjálfaði meistaraflokk karla þegar Valur varð bikarmeistari 2005 og Íslandsmeistari 2007. Við þökkum einnig núverandi þjálfarateymum meistaraflokks karla og kvenna fyrir samstarfið, þeim Frey Alexanderssyni, Þórði Jenssyni, Orra Sigurðssyni og Ragnheiði Jónsdóttur hjá kvennaliðinu og þeim James Bett, Friðriki E. Jónssyni, Birni Zoega, Sævari Gunnleifssyni og Halldóri Eyþórssyni hjá karlaliðinu. Að endingu viljum við þakka leikmönnum kvenna- og karlaliðs Vals í knattspyrnu fyrir frábært samstarf og hvetjum liðin áfram til árangurs," segir í yfirlýsingunni.

Þar segja fjórmenningarnir jafnframt:

„Við erum og verðum alltaf Valsmenn og dyggir stuðningsmenn félagsins. Áfram Valur!"